मंसिर २१ गते हुने दोस्रो चरणको प्रदेश र प्रतिनिधिसभा चुनावको प्रचार गर्न पाइने आज अन्तिम दिन हो। चुनाव हुन लागेका ४५ जिल्लाका १२८ क्षेत्रमा आज दलहरूले अन्तिम चुनावी सभा र घरदैलो गरिरहेका छन्।
एमाले अध्यक्ष ओली भने अन्तिम प्रचारका लागि आफ्नो क्षेत्रमा नजाने भएका छन्। सोमबार उनी काठमाडौं – ५ मा महासचिव ईश्वर पोखरेलको चुनावी सभामा सहभागी हुनेछन् भने दिउँसो भक्तपुरको चुनावी सभालाई सम्बोधन गर्नेछन्।
सबै दलका शीर्ष नेताहरू आ–आफ्नो निर्वाचन क्षेत्रमा पुगेका छन्। प्रधानमन्त्री एंव नेपाली कांग्रेसका सभापति शेरबहादुर देउवा आफ्नो निर्वाचन क्षेत्र रहेको प्रदेश नम्बर सात पुगेका छन्। देउवा डडेल्धुरा उम्मेदवार छन् भने उनकी पत्नी अारजु देउवा कैलाली -५ मा उम्मेदवार छन्।
पूर्वप्रधानमन्त्री तथा एमाले अध्यक्ष ओली भने प्रचारको अन्तिम दिन पनि आफ्नो निर्वाचन क्षेत्रमा हुने छैनन् । उनी उपत्यकाकै चुनावी कार्यक्रममा सहभागी हुने कार्यक्रम रहेको उनको निजी सचिवालयले जनाएको छ । ओली सोमबार बिहान काठमाडौं क्षेत्र ३ र दिउँसो भक्तपुर क्षेत्र २ को कार्यक्रममा सहभागी हुने छन् ।
विराटनगर र चितवन ३ अन्तर्गत पर्ने माडीको चुनावी सभामा आइतबार सहभागी भएका ओलीले आफ्नो क्षेत्रको प्रचारका कार्यक्रम सिध्याइसकेका छन् । उनी मंगलबार मात्रै झापा पुग्नेछन् तर सोही दिन उनको काठमाडौं फर्कने कार्यक्रम छ । ओलीले भक्तपुरको बालकोटबाट मतदान गर्ने भएकाले आफ्नो क्षेत्रमा हुने छैनन । उनले आइतबार र सोमबार विभिन्न मिडियालाई पनि समय छुट्याएका छन् ।
माओवादी केन्द्रका अध्यक्ष दाहाल भने चुनाव प्रचारको अन्तिम दिन पनि आफ्नै निर्वाचन क्षेत्रमा केन्द्रित हुनेछन् । उनलाई त्यहाँका चुनावी कार्यक्रममा पार्टीका वरिष्ठ नेता रामबहादुर थापाले पनि सहयोग गर्नेछन् । थापा पनि तीन दिनयता चितवनमै केन्द्रित छन् । थापा सोमबार चितवन महानगरको वडा नम्वर १६, २६ र २२ का चुनावी कोणसभा, कार्यकर्ता भेटघाटलगायतमा सहभागी हुनेछन् ।
एमाले वरिष्ठ नेता तथा पूर्वप्रधानमन्त्री माधव नेपाल पनि आफ्नै निर्वाचन क्षेत्र केन्द्रित हुँदै छन् । नेपालले सोमबार बिहान कागेश्वरी मनोहरा ७ मा घरदैलो कार्यक्रम राखेका छन् भने दिउँसो कोटेश्वरमा चुनावी सभाको कार्यक्रम राखेका छन् ।
कांग्रेस वरिष्ठ नेता रामचन्द्र पौडेल तनहुँकै चुनावी कार्यक्रममा हुनेछन् । कांग्रेसले तनहुँको दमौलीमा सोमबार चुनावीसभा आयोजना गरेको छ । कांग्रेस नेता डा. रामशरण महत, नेता बालकृष्ण खाँण भने बुटवल र भैरहवाको चुनावी कार्यक्रममा सहभागी हुने भएका छन् । आजको अन्नपूर्ण पोष्टमा छापिएको छ ।
