नेपालमा कोभिड–१९ का थप १ सय ३३ जना सङ्क्रमित

नेपालमा कोभिड–१९ का १३३ जना नयाँ सङ्क्रमित थपिएका छन् । पछिल्लो चौबीस घण्टामा तीन हजार ९८७ जनाको आरटी पीसीआर परीक्षण गरिएकोमा १३३ जनामा कोरोनाभाइरस सङ्क्रमणको पुष्टि भएको हो ।

स्वास्थ्य तथा जनसंख्या मन्त्रालयले आफ्नो नियमित पत्रकार सम्मेलनमा नेपालमा पछिल्लो चौबीस घण्टामा थपिएका नयाँ सङ्क्रमितसँगै कुल सङ्क्रमितको संख्या १८ हजार ३७४ पुगेको जनाएको छ । मन्त्रालयका प्रवक्ता डा. जागेश्वर गौतमका अनुसार हाल पाँच हजार ३८३ जनामा कोभिड–१९ को सङ्क्रमण सक्रिय रहेको छ ।

मन्त्रालयका अनुसार हाल क्वारेन्टिनमा १९ हजार ४४४ जना रहेका छन् । पछिल्लो चौबीस घण्टामा १०७ जना कोरोना सङ्क्रमित निको भएर घर फर्केका छन् । यो सँगै नेपालमा कोरोनामुक्त भएकाको संख्या १२ हजार ९४७ पुगेको छ ।
मन्त्रालयका प्रवक्ता डा. गौतमले पछिल्लो चौबीस घण्टामा थप एकजना कोरोना सङ्क्रमितको मृत्यु भएको जानकारी दिनुभयो । यससँगै नेपालमा कोभिड–१९ बाट मृत्यु हुनेको संख्या ४४ पुगेको छ ।

बिरगञ्ज महानगरपालिका वडा नं ११, श्रीपुर निवासी ८५ वर्षीया महिला रहेको उहाँले जानकारी दिनुभयो । उपचारको क्रममा बिहान छ बजेर ४५ मिनेटमा नारायणी उपक्षेत्रीय अस्पताल, बिरगञ्जमा उहाँको निधन भएको मन्त्रालयले जनाएको छ । मुटु सम्बन्धी रोगसँगै निमोनियाबाट ग्रसित उहाँलाई उपचारको लागि अस्पताल भर्ना गरिएको थियो ।

फेसबुकबाट तपाईको प्रतिक्रिया

LEAVE A REPLY

Please enter your comment!
Please enter your name here