ललित बसेल । कर्णाली प्रदेश सरकारले कोरोना भाइरसको रोकथाम र नियन्त्रणका लागि प्रदेशका हरेक टोलमा युनिफाइट टिम बनाएको छ । कर्णाली प्रदेशका मुख्यमन्त्री महेन्द्रबहादुर शाहीले प्रदेशका हरेक गाउँका टोलहरूमा युनिफाइट टिम गठन गरेर रोगविरुद्ध अभियान थालिएको बताउनुभएको छ ।
सो टिममा जनप्रतिनिधि, स्वास्थ्यकर्मी, सुरक्षाकर्मी, स्वयंसेवक गरी बढीमा छ जनासम्म रहनेछन् । सो टिमले आआफ्नो टोलमा कोरोना भाइरस रोकथाम, नियन्त्रण लगायतका काम गर्नेछ । मुख्यमन्त्री शाहीले टोलदेखि नै सक्रिय भएपछि रोग नियन्त्रण र रोकथाममा मद्दत पुग्ने उद्देश्यले युनिफाइट टिम गठन गरिएको जानकारी दिनुभयो ।
उहाँले कर्णालीमा अहिलेसम्म कोरोना भाइरसका कुनै पनि सङ्क्रमित नपाइएको हुँदा यस्तै अवस्था बनाउन प्रदेश सरकारले स्थानीय तहसँग समन्वय गरिरहेको जानकारी दिनुभयो । कर्णालीबाट कतिपय मानिस काम गर्न भारत जाने र आउने हुँदा सबैभन्दा पहिला नाकामा स्वास्थ्यकर्मीसहितको टोली राखेर निगरानी गरिएको उहाँको भनाइ छ ।
प्रत्येक जिल्लामा आइसोलेसन वार्ड
प्रदेशमा रहेका ७९ वटा स्थानीय तहमा कोरोना भित्रिन नदिन विशेष सजग गराइएको मुख्यमन्त्री शाहीले स्पष्ट पार्नुभयो । त्यसका लागि प्रत्येक स्थानीय तहमा क्वारेन्टाइन र आइसोलेसन वार्ड स्थापना गरिएको छ । प्रदेश राजधानी सुर्खेतको वीरेन्द्रनगर र जुम्लामा तीन सय बेडको क्वारेन्टाइन बनाइएको जानकारी दिँदै उहाँले प्रत्येक जिल्लामा बढीमा ५० बेडको आइसोलेसन वार्ड बनाउन प्रदेश सरकारले बजेट दिइसकेको जानकारी दिनुभयो ।
जनशक्ति र उपकरणको कमी
कोरोना रोकथाम र नियन्त्रणका लागि प्रयास थालिएको छ तर केही चुनौती थपिएको उहाँ बताउनुहुन्छ । जनशक्ति अभाव र आवश्यक उपकरणको समस्याले काम गर्न केही कठिनाइ भए पनि प्रदेश सरकारले रोग नियन्त्रण र रोकथाममा कुनै कसर बाँकी नराखेको मुख्यमन्त्री शाहीको दाबी छ । यद्यपि प्रदेशमा जति जनशक्ति र उपकरण छ, त्यसको पूर्ण रूपमा उपयोग गर्दै कोरोना विरुद्धको अभियानमा सक्रिय भएको जानकारी उहाँले दिनुभयो ।
स्वास्थ्य/सुरक्षाकर्मीलाई सुविधा थप
सङ्कटको अवधिमा पहिलो तहमा सक्रिय रहेर काम गर्ने स्वास्थ्यकर्मीलाई शतप्रतिशत र सुरक्षाकर्मीलाई ५० प्रतिशत सुविधा थप गरेर मनोबल बढाइएको उहाँले बताउनुभयो । लकडाउनको बेलामा अहोरात्र खटिने स्वास्थ्यकर्मी र सुरक्षाकर्मीका लागि प्रदेश सरकारले प्रोत्साहन दिन सुविधा थपेको भन्दै मुख्यमन्त्री शाहीले अहिलेलाई तीन महिनाका लागि यो सुविधा दिने निर्णय गरिएको जनाउनुभयो ।
जहाँ छन् त्यहीँ बस्ने व्यवस्था
लकडाउनको सुरुमा सीमामा अलपत्र परेका कर्णालीवासीलाई प्रदेश सरकारले सम्बन्धित जिल्ला तथा स्थानीय तहको क्वारेन्टाइनमा राख्ने सर्तमा पु¥याए पनि अहिले जहाँ छन् त्यहीँ बस्ने व्यवस्था मिलाइएको मुख्यमन्त्री शाहीको भनाइ छ । उहाँले भन्नुभयो, “अब यता आउँदा रोग भित्रिन सक्ने जोखिम बढी भएकाले जहाँ हो, त्यहीँ बस्ने व्यवस्था मिलाइएको छ । ” भारतसँगको सीमा नाकामा रहेका कर्णालीवासीको अवस्था बुझ्न प्रदेश सरकारले आन्तरिक मामिला तथा कानुनमन्त्री नरेश भण्डारीलाई पठाएको बताउँदै उहाँले प्रदेशवासीको अवस्थाप्रति गम्भीर भएर प्रदेश सरकारले मन्त्री पठाएको जानकारी दिनुभयो ।
विपन्नलाई राहत
मुख्यमन्त्री शाहीले लकडाउनका कारण काम गरी खाने मजदुर वर्ग, विपन्न समुदायलाई मर्का परेको र त्यसका लागि स्थानीय तहसँग समन्वय गरेर राहत प्याकेज ल्याइएको बताउनुभयो । यकिन तथ्याङ्क नभएको हुँदा स्थानीय तहसँग समन्वय गरेर राहतको प्याकेज लैजाने तयारी भइरहेको उहाँको भनाइ छ ।
खाद्यान्न अभाव हुँदैन
मुख्यमन्त्री शाहीले तीन महिनासम्म प्रदेशका जिल्लाहरूमा खाद्यान्न अभाव नहुने बताउनुभएको छ । उहाँले हुम्लामा खाद्यान्न अपुग भएको जानकारी आएपछि अहिले धमाधम हेलिकप्टरबाट खाद्यान्न पु¥याउने काम भइरहेकाले अब समस्या नभएको दाबी गर्नुभयो ।
परीक्षणले सहज
कर्णाली प्रदेशको राजधानी सुर्खेतमै कोरोना भाइरस परीक्षणको कार्य थालिएकोमा मुख्यमन्त्री शाहीले खुसी व्यक्त गर्नुभएको छ । उहाँले कोरोना आशङ्का गरिएकाको थ्रोट स्वाब परीक्षणका लागि काठमाडाँैं पठाउनुपर्ने अवस्था नभएकाले सुर्खेतमै परीक्षण हुँदा यसले सहज बनाउने बताउनुभयो । – गोरखापत्र
