संयुक्त राज्य अमेरिकामा कोरोना भाइरसको संक्रमणमा केही कमी आएको छ । देशभर फैलिएको कोरोना महामारीबाट आक्रान्त बनिरहेको अमेरिकामा केही दिनयतादेखि भाइरसको संक्रमण निरन्तर घट्दै गइरहेको पछिल्लो तथ्यांकले देखाएको छ । त्यसैगरी, मृतकको संख्यामासमेत कमी आइरहेको छ ।
अमेरिकामा कोभिड –१९ सम्बन्धि अफिसियल डाटा अपडेट गर्दै आइरहेको न्युजब्रेकका अनुसार कोरोना संक्रमणका कारण विश्वको सवैभन्दा धेरै प्रभावित मुलुक अमेरिकामा मृतकको संख्या घटेर आज करिब चार सयको हाराहारीमा झरेको छ भने गएको २४ घण्टाको अवधिमा ३३ हजार सात सय ६४ व्यक्ति कोरोना भाइरसबाट संक्रमित भएका छन् ।
विगतका दिनहरूमा अमेरिकामा कोरोना संक्रमितको संख्या दैनिक ७७ हजारसम्म पुगेकोमा हाल त्यो संख्या आधाआधीमा झरेको छ । त्यस्तै, अघिल्ला महिनाहरुमा कोरोनाबाट अमेरिकामा दैनिक रूपमा करिब साढे चार हजारको हराहारीमा मानिसहरुको मृत्यु भएको थियो ।
यसैगरी। केही दिनयता नयाँ संक्रमित तथा मृतकको संख्यामा कमी आउनथालेपछि अमेरिकाको जनजीवन केही सहज देखिएको छ भने व्यापार–व्यावसाय तथा कार्यालयहरूले आफ्नो सेवा पुनःसञ्चालन गर्न थालेका छन् ।
गत फागुनमा पहिलोपटक कोरोना भाइरसको संक्रमण देखिएयता हालसम्म अमेरिकामा झण्डै ६१ लाख ५० हजार मानिस संक्रमित भएका छन् । यस अवधिमा एक लाख ८६ हजारभन्दा बढीको ज्यान गइसकेको छ । मृतकको संख्यामध्ये ५० वर्षमाथिको उमेर समूह अधिक छ भने ३० वर्षभन्दा कम उमेरका मानिस नगन्य मात्रमा रहेको प्राप्त तथ्यांकले औंल्याएको छ । हालसम्म २३ लाख २५ हजार अमेरिकाबासी कोरोना संक्रमणबाट मुक्त भइसकेका छन् ।
अमेरिकामा आइतबार करिब ४८ हजार व्यक्तिमा कोरोनाकोे संक्रमण भेटिएको थयो भने अघिल्लो दिनको संक्रमित संख्यासमेत सोही सेरोफेरोमा रहेको थियो ।
साथै, आइतबार मात्रै १२ सय बढीको ज्यान गएको अमेरिकामा शनिबार एक हजार ३९ जनाको मृत्यु भएको स्थानीय संचारमाध्यमहरूले उल्लेख गरेका छन् । अघिल्ला साताहरूमा मृत्युदर स्थिर देखिएता पनि नयाँ संक्रमितहरूको संख्या अत्याधिक मात्रामा थपिँदा सर्वसाधारण निकै त्रसित थिए । तर, पछिल्लोसमय संक्रमित संख्यामा कमी आएसँगै केही राहत महसुस गर्न थालिएको छ भने बजारमा मानिसहरूको चहलपहल समेत बढेको छ ।
तथ्यांकअनुसार कोरोनाको संक्रमण फैलिएका अमेरिकाका ५० वटै राज्यमध्ये सबैभन्दा बढी मानवीय क्षति खेप्नुपरिरहेको न्युयोर्कमा अहिले संक्रमित तथा मृतकको संख्या करिब शून्यमा झरेको छ । यहाँ अहिलेसम्म करिब ३३ हजार मानिसको मृत्यु भएको छ भने झण्डै साढे ४ लाख मानिस संक्रमित भएका छन् ।
१६ जना नेपालीले ज्यान गुमाए
कोरोनाको संक्रमणका कारण अहिलेसम्म अमेरिकामा १६ जना नेपालीको ज्यान गइसकेको छ भने सयौंको संख्यामा संक्रमित रहेको यहाँका विभिन्न सामाजिक संघसंस्थाहरूले उल्लेख गरेका छन् ।
यता, क्यालिफोर्नियामा समेत कोरोनाबाट मृत्यु हुनेको संख्या बढेर करिब १३ हजार पुगेको छ भने झण्डै सात लाखभन्दा बढी मानिसमा संक्रमण देखिएको छ । क्यालिफोर्नियामा कोरोना संक्रमितको संख्या सबैभन्दा बढी छ । कोरोनाको संक्रमणबाट अहिलेसम्म विश्वभर झण्डै साढे आठ लाख मानिसको मृत्यु भएको छ भने संक्रमितको संख्यासमेत दुई करोड ५० लाख नाघेको छ । नेपाली नेटवर्क
