प्रतिनिधि सभा विघटन गरेर असंवैधानिक कदम चालेको सरकारले नागरिकको अभिव्यक्ति स्वतन्त्रता खोस्ने प्रयास गरेको छ । राष्ट्रपतिविरुद्ध बोलेको भन्दै प्रहरीले बुधबार नेपाल कम्युनिष्ट पार्टी नेकपा प्रचण्ड–नेपाल समूहकी नेता रामकुमारी झाँक्रीलाई पक्राउ गरेको थियो । उनको पक्राउपछि अधिकांश नेताहरूले सरकारविरुद्ध आन्दोलन चर्किदै जाने चेतावनी दिएका छन् ।
राष्ट्रपतिले पदको गरिमा राख्न सकिनन्ः गगन थापा
नेपाली कांग्रेसका नेता गगनकुमार थापाले राष्ट्रपति विद्यादेवी भण्डारीले पदको गरिमा राख्न नसकेको बताएका छन् । मोरङको विराटनगरमा बिहीबार कांग्रेस महानगर समितिले गरेको कार्यक्रममा नेता थापाले राष्ट्रपतिले पदको गरिमा राख्न नसकेकाले चपलीस्थित घर पठाउनुपर्ने बताए । उनले नेपालको संविधान प्रधानमन्त्री केपी शर्मा ओलीको सनकको शिकार भएको समेत टिप्पणी गरे ।
क्षमा पूजाका नाममा नौटंकीः गुरुराज घिमिरे
सोही कार्यक्रममा कांग्रेसका अर्का नेता गुरुराज घिमिरेले प्रधानमन्त्री ओलीमा तानाशाह प्रवृत्ति देखिएको बताए । नेता घिमिरेले पशुपतिनाथको मन्दिरमा ओलीले क्षमा पूजाका नाममा नौटंकी गरेको उल्लेख गरे । कम्युनिष्टलाई धर्मप्रति विश्वास नहुने बताएका घिमिरेले पशुपतिमा पुगेर पूजा गर्नुलाई पाखण्ड र ढोंगको संज्ञा दिए ।
अदालतले संविधानमा थपघट गर्न मिल्दैनः प्रदिप पौडेल
विराटनगरमा महानगर समितिले नै गरेको कार्यक्रममा कांग्रेस नेता प्रदीप पौडेलले अदालतलाई संविधानका कुनैपनि धारा थपघटको अधिकार नभएको बताएका छन् । अदालतले संविधानभन्दा बाहिर रहेर व्याख्या गर्न नहुने भन्दै नेता पौडेलले संविधान संशोधन गर्ने अधिकार अदालतलाई नरहेको उल्लेख गरे । यद्धपि सर्वोच्च अदालतबाट संविधानकै पक्षमा फैसला हुनेमा विश्वास रहेको उनको भनाई छ ।
प्रतिगमनविरुद्धको आन्दोलन थप सशक्त हुन्छः रामकुमारी झाँक्री
नेकपा प्रचण्ड – नेपाल समूहकी नेता रामकुमारी झाँक्रीले सरकारको प्रतिगमनविरुद्धको आन्दोलन अब थप सशक्त हुने बताएकी छिन् । बुधबार साँझ अपराध अनुसन्धान महाशाखाबाट रिहा भएपछि पत्रकारहरूसँग कुरा गर्दै नेता झाँक्रीले चौतर्फी दबाबका अघि सरकारको दमन हारेको टिप्पणी गरिन् । राष्ट्रपतिले गरेको गलत कामको विरोधमा आफूले बोलेकोमा कुनै पछुतो नभएको नेता झाँक्रीको भनाई छ ।
Discussion about this post