नेपाल रिडर्सले मिटरब्याज पीडित दलित महिला सपनामाथि भएको नृशंस बलात्कारजन्य समाचार पाँच लाख ऋण तिर्न नसक्दा ८० लाखको घरजग्गा कब्जा, पटक-पटक बलात्कार प्रकाशित गरेपछि उपप्रधान तथा गृहमन्त्री नारायणकाजी श्रेष्ठले आज (शुक्रबार) पीडित महिलालाई भेटेका छन्।
पीडित महिलाको कुरा सुनेका गृहमन्त्रीले पीडितलाई हर-हालतमा न्याय दिलाउने वाचा गरे। मिटरब्याजको पासोमा परेर घरजग्गा गुमाएकी सपनालाई मन्त्री श्रेष्ठले भने, ‘तपाईंको घरजग्गा फिर्ता गराउने र तपाईंमाथि भएको यौन शोषणविरुद्धको न्यायीक प्रक्रियामा हामी साथमा छौं। अपराधीलाई कुनै पनि मुल्यमा छोडिने छैन।’
मिटरब्याजी सुर्जमान मालीसँग सपनाले ०७६ मा ५ लाख रुपैयाँ लिएकी थिइन्। उनले २ लाख रुपैयाँ चुक्ता समेत गरिसकेकी थिइन्। ५ लाख रुपैयाँ ऋणलाई ६५ लाख ऋण लिएको नक्कली कागज बनाएर मिटरब्याजी सुर्जमान मालीले सपनाको घरजग्गा हत्याईंसकेका छन् । किर्ते कागजात गरि सपनाको जग्गा हड्पेर मिटर ब्याजी मालीले उनीमाथि एकल तथा सामूहिक बलात्कार गराएका थिए।
गृहमन्त्री श्रेष्ठले लतिलपुरका प्रमुख जिल्ला अधिकारी रुद्रप्रसाद पण्डितलाई फोन गरेर सपनाको मुद्वामा तत्काल कानुनी प्रक्रिया अगाडि बढाउन निर्देशन दिए। मन्त्री श्रेष्ठले भनें, ‘पीडितले न्याय पाउनुपर्छ। सबैभन्दा पहिला उहाँको गुमेको घर जग्गा फिर्ताको प्रक्रिया सुरु गर्छौं। त्यससँगै मीटर ब्याजको आडमा यौन शोषण गर्नेलाई पक्राउ गरेर कारबाहीको प्रक्रिया अगाडि बढाउँछौं।’
गृहमन्त्री श्रेष्ठलाई भेटेपछि मिटरब्याज पीडित सपनाले न्याय पाउने आशा पलाएको प्रतिक्रिया दिइन। उनले भनिन्, ‘मैले न्याय पाउँछु होला भन्ने आशै मारिसकेकी थिएँ, तर अहिले गृहमन्त्रीलाई भेटेपछि न्यायको आशा पलाएको छ।’
गृहमन्त्री श्रेष्ठलाई आफ्नो पीडा सुनाउँदा मन्त्रालयमैं पटक-पटक भक्कानिएकी सपनाले न्यायिक प्रक्रियामा अब आफू एक्लो नभएको बताइन्।
यो पनि पढ्नुहोस्-
