संसद विघटनविरुद्ध आन्दोलन चर्किदै गएको छ । नेपाल कम्युनिष्ट पार्टी प्रचण्ड–नेपाल समूहले तेस्रो चरणको आन्दोलनको घोषणा गरेको छ भने सोमबार मार्चपासमा ओर्लिएका नागरिक अगुवाहरुमाथि प्रहरीले दमन गरेको छ । नेकपा प्रचण्ड–नेपाल समूहका नेताहरुले अब निर्णायक संघर्ष गर्ने बताएका छन् भने आफूमाथि दमन भएको भन्दै नागरिक आन्दोलनका अगुवाहरुले तेस्रो जनआन्दोलनको घोषणा गरेका छन् ।
अब निर्णायक संघर्ष : प्रचण्ड
नेकपा अध्यक्ष पुष्पकमल दाहाल प्रचण्डले संसद् विघटनविरुद्ध अब निर्णायक संघर्ष गर्ने बताएका छन् । पार्टी कार्यालय पेरिसडाँडामा सोमबार आयोजित कार्यक्रममा अध्यक्ष प्रचण्डले अब काठमाडौँ केन्द्रित आन्दोलन गर्ने र त्यो निर्णायक हुने बताए ।
‘हामीले प्रदेश नम्बर २ को जनकपुरमा विशाल सभा आयोजना गर्ने र त्यहाँबाट सन्देश दिने सोचेका थियौँ ’ प्रचण्डले भने ‘स्थायी कमिटीको बैठकमा छलफल गर्दै जाँदा जनकपुरमा पनि गर्नैपर्छ र जनकपुरमा भन्दा अगाडि अस्तिको भन्दा काठमाडौंमा अझै ठूलो प्रर्दशन गर्नुपर्ने भयो भन्ने महसुस गर्यौं ।’ उनले थपे ‘किनभने टाउकोमै हान्नुपर्ने स्थिति आयो । अन्त हानेर त्यति धेरै चोट पुग्दैन कि भन्ने सोचेर टाउकोमै हान्ने निष्कर्षमा पुगेका छौँ ।’
ओलीले संकटकाल लगाउन सक्छन् : माधवकुमार नेपाल
नेकपा पुष्पकमल दाहाल प्रचण्ड–माधवकुमार नेपाल पक्षका अध्यक्ष माधवकुमार नेपालले प्रधानमन्त्री ओलीको चुनाव गराउने इच्छा नभएको बताएका छन् । सोमबार पार्टी केन्द्रीय कार्यालयमा प्रदेश नं. २ का नेता कार्यकर्तासँग भेटघाट गर्दै अध्यक्ष नेपालले संकटकाल लगाएर अथवा तानाशाह लादेर भए पनि सत्तामा बसिरहन चाहेको जिकिर गरे ।
सोमबार पार्टी केन्द्रीय कार्यलय पेरिडाँडामा पत्रकार सम्मेलन गरी नेकपा प्रचण्ड–माधव समूहले यही माघ १३ देखि २८ गतेसम्म काठमाडौँमा विशाल विरोध प्रदर्शन र सभासहित तेस्रो चरणको आन्दोलनको घोषणा गरेको छ ।
तेस्रो जनआन्दोलनको घोषणा
सोमबार माटोको टीका लगाएर कमल पोखरीबाट बालुवाटारसम्म शान्तिपूर्ण रुपमा मार्चपास गरेका नागरिक अगुवाहरुमाथि प्रहरीले दमन गरेको भन्दै नागरिक अगुवाहरुले तेस्रो जनआन्दोलनको घोषणा गरेका छन् । वृहत नागरिक आन्दोलनको तर्फबाट युग पाठकले जारी गरेको विज्ञप्तिमा भनिएको छ, ‘नागरिकले गरेको शालीन र शान्तिपूर्ण अभियानलाई प्रहरीले नै बलजफ्ती मुठभेडमा परिणत ग-यो।
कोणसभापछि शान्तिपूर्ण रुपमा अघि बढेको जुलुसलाई प्रहरीले एक्कासी लाठी र पानीको फोहोरा प्रहार ग-यो। सरकारी रबैयाको यो कदमलाई नागरिक आन्दोलन घोर भर्त्सना गर्दछ । यसै विज्ञप्तिमार्फत सबैखाले राजनीतिक एवं सांस्कृतिक प्रतिगमनविरुद्ध वृहत् नागरिक आन्दोलन तेस्रो जनआन्दोलन घोषणा गर्दछ।’ तस्वीर सौजन्य: सुवास श्रेष्ठ/रातोपाटी