प्रतिनिधि सभा विघटनविरुद्ध नेकपा प्रचण्ड–नेपाल समूह, नेपाली कांग्रेस लगायतका दलहरूले चरणबद्ध आन्दोलन गरिरहेका छन् । आन्दोलनरत दलका नेताहरूले प्रधानमन्त्रीको कदम असंवैधानिक भएको भन्दै उनको चर्को आलोचना गरेका छन् ।
संसद विघटन संवैधानिक व्यवस्थाको प्रतिकुल कार्य हो : शेरबहादुर देउवा
नेपाली कांंग्रेसका सभापति शेरबहादुर देउवाले संसद विघटनविरुद्ध नेपाली कांग्रेस एकमतका साथ आन्दोलनमा रहेको बताएका छन् । सभापति देउवाले सोमबारको विरोधसभामा सहभागी हुन आह्वान गर्दै आइतबार जारी गरेको विज्ञप्तिमा संसद विघटन संवैधानिक व्यवस्थाको प्रतिकुल र जनभावना विपरितको कार्य भएको टिप्पणी गरे । पार्टीले संसद विघटनलाई असंवैधानिक र अलोकतान्त्रिक ठहर गरिसकेको उनले उल्लेख गरे ।
कुनैपनि कुशासकलाई छोडिदैनः माधवकुमार नेपाल
नेपाल कम्युनिष्ट पार्टी प्रचण्ड–नेपाल समूहका अध्यक्ष माधवकुमार नेपालले प्रधानमन्त्री केपी शर्मा ओली तानाशाह बन्न खोजेको आरोप लगाएका छन् । प्रतिनिधिसभा विघटनको विरोधमा आइतबार तेह्रथुममा आयोजित विरोध सभालाई सम्बोधन गर्दै अध्यक्ष नेपालले जनताको अधिकार खोस्ने जुनसुकै कुशासक आएपनि नछोड्ने बताए । उनले आफ्नो समूहकी नेता रामकुमारी झाँक्रीलाई पक्राउ गरेर सरकारले आफूहरूको पनि मुटु छामेको टिप्पणी गरे ।
राजनीतिक स्वार्थका लागि पशुपथिनाथको उपयोग गरियोः नारायणकाजी श्रेष्ठ
नेपाल कम्युनिष्ट पार्टी (नेकपा) प्रचण्ड–नेपाल समूहका प्रवक्ता नारायणकाजी श्रेष्ठले धर्म र पशुपतिनाथलाई संकिर्ण राजनीतिक स्वार्थको निम्ति उपयोग गरिएको बताएका छन् । आइतबार नेकपा केन्द्रीय संघर्ष समितिको चौथो चरणको आन्दोलन घोषणा कार्यक्रममा सञ्चारकर्मीसँग कुरा गर्दै प्रवक्ता श्रेष्ठले राजनीतिका लागि धर्मलाई दुरुपयोग गर्न नहुने बताए । उनले भने, ‘हाम्रो संविधानले नेपाललाई धर्म निरपेक्ष राज्य भनेको छ, त्यसको अर्थ राज्य धर्मबाट अलग हुने भनेको हो । तर नेपाली जनताको धार्मिक आस्थाको, धार्मिक स्वतन्त्रताको हामी उच्च सम्मान गर्दछौँ।’