प्रधानमन्त्री केपी शर्मा ओलीले गरेको संसद विघटनको नेताहरुले चर्को विरोध गर्दै आएका छन् । नेकपा प्रचण्ड–माधव समूह र नेपाली कांग्रेसका नेताहरुले मंगलबार प्रतिगमनको विरोध गर्नुका साथै सोमबार नागरिक आन्दोलनमाथि भएको दमनको आलोचना गरे ।
दमनले थप उर्जा दिन्छः पौडेल
नेपाली कांग्रेसका वरिष्ठ नेता रामचन्द्र पौडेलले नागरिक समाजको शान्तिपूर्ण विरोध कार्यक्रममा भएको दमनको कडा आलोचना गरेका छन् । तानाशाहले आफ्नो अन्तिम घडीमा यसैगरी दमनमा उत्रने गरेको भन्दै नेता पौडेलले नागरिक आन्दोलनप्रति आफ्नो साथ र समर्थन रहेको बताए । ‘तर, दमनले नागरिकलाई थप उर्जा प्रदान गर्दछ र अझै प्रतिगमनसँग डटेर लड्नका लागि प्रतिगमन विरुद्ध सबै आन्दोलनमा मेरो साथ र समर्थन रहनेछ’ पौडेलले सामाजिक सञ्जालमा लेखेका छन्, ‘लोकतन्त्र र लोकतान्त्रिक संविधानको रक्षाका लागि हुने आन्दोलनमा म आफैं अघिल्लो मोर्चामा हुनेछु ।’ नागरिक आन्दोलनका अगुवाहरुले सोमबार कमलपोखरीदेखि बालुवाटारसम्म गरेको मार्चपासमा प्रहरीले दमन गरेको थियो ।
संविधानको रक्षा गर्ने दायित्व अदालतको : भूसाल
नेकपा प्रचण्ड–माधव समूहका नेता घनश्याम भूसालले संसद विघटन सदर भए यो व्यवस्था नै प्यारालाइज्ड हुने बताएका छन् । तिलोत्तमाको ड्राइभरटोलमा मंगलबार आयोजित अन्तरक्रियामा नेता भूसालले ओलीले गरेको संसद विघटनलाई सर्वोच्च अदालतले सदर गरेमा न्यायपालिकामाथि आक्रमण हुने समेत बताए । अहिलेको संघीय लोकतान्त्रिक गणतन्त्रात्मक व्यवस्थासँग बदला लिन प्रधानमन्त्री केपी ओलीले प्रतिनिधि सभा विघटन गरेको नेता भूसालको टिप्पणी छ ।
अन्तरक्रियामा नेकपा केन्द्रीय सदस्य ठाकुर गैरेले संसद विघटनविरुद्धको आन्दोलन प्रचण्ड–माधव पक्षको मात्र नभई संविधान, गणतन्त्र र राष्ट्रियता रक्षाको आन्दोलन भएको बताए ।
प्रहरी दमन निन्दनीयः सिंह
कांग्रेस नेता प्रकाशमान सिंहले पनि सामाजिक सञ्चालमार्फत नागरिक आन्दोलनमाथि बालुवाटारमा भएको प्रहरी दमन निन्दनीय भएको बताएका छन् । नेता सिंहले लेखेका छन् ‘असंवैधानिक कदमविरूद्ध बालुवाटारमा शान्तिपूर्ण विरोध कार्यक्रम गर्नेहरुमाथि भएको प्रहरी दमन निन्दनीय छ । नागरिक आन्दोलनको आवाज दबाउन गरिएको हस्तक्षेपले केपी ओेली नेतृत्वको वर्तमान सरकारको तानाशाही र अधिनायकवादी चरित्र उदांगिएको छ ।’