समाजवादी पार्टीका सहअध्यक्ष राजेन्द्र प्रसाद श्रेष्ठले काँग्रेस र नेकपाले भन्ने गरेको समाजवाद बाउन्स चेकसँग तुलना गरेका छन् । ललितपुरको महालक्ष्मी नगरपालिकामा विभिन्न पार्टीमा कार्यकर्ता तथा स्थानीय समाजसेवी युवाहरूलाई पार्टी प्रवेश गराउदै श्रेष्ठले उक्त कुरा तुलना गरका हुन् ।
‘काङ्ग्रेस र नेकपाले भन्ने गरेको समाजवाद बाउन्स चेक जस्तै हो । भुक्तानीका लागि दिएको चेकको पैसा लिन जाँदा बैंक खातामा पैसा नभए जस्तै उनीहरूले भनेको समाजवादमा समाजवादको ‘स’ पनि छैन ।’ श्रेष्ठले भने ।नेता श्रेष्ठले मुहान नै धमिलो भए स्वच्छ पानी नआउने भन्दै पुराना राजनीतिक दलहरू भ्रष्टाचार र व्यभिचारको पर्याय बनेको बताए । उनले आफ्नो पार्टीले पहिचान र अधिकारसहितको सङ्घीयता, सुशासनयुक्त राज्य र समतामूलक समृद्धिको माध्यमबाट समाजवादमा पुग्ने लक्ष्य राखेको बताए । उनले समाजवादी पार्टीले पुराना पार्टीहरूले जस्तो एकल जातीय पार्टी नबनाउने बताउँदै आफ्नो पार्टीले जस्तो समाज उस्तै पार्टी, जस्तो समाज उस्तै राज्यको परिकल्पना गरेको बताए ।
श्रेष्ठले समाजवादी पार्टीले सिद्धान्तमा मात्र नभई सङ्गठन र कार्यशैलीमा पनि नयाँपन ल्याउनुपर्ने बताए । पुँजीवादीहरूले नेताहरूलाई ग्रेटम्यान ठानेर देवत्वकरण गर्ने गरेको छ । त्यसको सिको गर्दै आफ्नो पार्टीमा पनि पुँजीवादी विकृति भित्रन सक्ने भएकाले सतर्क रहनुपर्ने बताए । उनले नेताहरू आउँछन् जान्छन् तर नीति निरन्तर अगाडी बढ्ने बताउँदै समाजवादीहरूले नेताहरूको ब्रान्डनेम होइन समुन्नत सङ्घीय समाजवादलाई ब्रान्ड बनाएर जानुपर्ने बताए ।
महालक्ष्मी नगर समतिका अध्यक्ष दीपा थापा मगरको अध्यक्षतामा भएको उक्त कार्यक्रममा पार्टीका राजनीतिक समिति सदस्य डा पुस्पराज राजकर्णीकार, केन्द्रीय सदस्य तथा कर्णाली प्रदेश इन्चार्ज राजन केसी, केन्द्रीय सदस्य तथा ३ नम्बर प्रदेशका सहइन्चार्ज लालवहादुर तामाङ, केन्द्रीय विज्ञ परिषद सदस्य बिनोद नेपाली लगायतले समाजवादी पार्टी देशको वैकल्पीक राजनीतिक शक्ति बनेको बताए ।
नेपाल कम्युनिष्ट पार्टी लगायत विभिन्न पार्टी परित्याग गरी अब्बास पण्डीत लगायत ८१ जना व्यक्तिहरू पार्टी प्रवेश गरेको उक्त कार्यक्रममा पार्टीका केन्द्रीय सदस्यहरू उत्तम लामा, मानवहादुर धामी, केन्द्रीय सदस्य तथा ३ नम्बर प्रदेशका मुख्य सचिव मोहन बराइली, नेवाः प्रदेश उपाध्यक्ष जनक थापा, रमेश महत लगायतले पनि नवप्रवेशीहरूलाई स्वागत गरेका थिए।
