आज प्रकाशित दैनिक पत्रिकाको प्राथमिकतामा बालुवाटार जग्गा हिनामिना प्रकरणबारे भइरहेको छानबिनमा मन्त्रालयकै असहयोग भएको लगायत विविध विषय परेका छन् ।नागरिक दैनिकले बालुवाटारस्थित ललितानिवास जग्गा हिनामिना प्रकरणबारे भइरहेको छानबिनमा मन्त्रालयले नै असहयोग गरेको लेखेको छ । यसबारे अनुसन्धान गरिरहेको प्रहरीको केन्द्रीय अनुसन्धान व्युरोले प्रधानमन्त्री निवास विस्तार गर्ने निर्णयको फाइल भौतिक पूर्वाधार तथा यातायात मन्त्रालयसँग मागेको थियो । तर, यो फाइल नदिएर मन्त्रालयका उच्च अधिकारीले असहयोग गरेको नागरिकले लेखेको छ ।

सीआईबीले सो निर्णयको प्रतिलिपि र उक्त कार्यमा संलग्न कर्मचारीको विवरणसहितको फाइल उपलब्ध गराउन पटक पटक भौतिक पूर्वाधार तथा यातायात मन्त्रालयलाई ताकेता गरेको छ । तर मन्त्राललयका उच्च पदाधिकारीले अटेर गर्दै आएका छन् ।’भौतिक पूर्वाधार तथा यातायात मन्त्रालयका जिम्मेवार अधिकारीहरू फाइल आफूहरूसँग नभएको भन्दै पन्छिने गरेको समाचारमा उल्लेख छ ।नागरिकका अनुसार, यही कारण सीआईबीले अनुसन्धानको अन्तिम प्रतिवेदन तयार गर्न सकेको छैन ।

छाता ओढेर कक्षामा
छाता ओढेर कक्षा लिन बाध्य विद्यार्थीको कथा पनि आजका नागरिकले छापेको छ ।रोल्पा नगरपालिकासँग सिमाना जोडिएको रुटीगढी गाउँपालिका–१, जेदवाङस्थित नेपाल राष्ट्रिय माध्यमिक विद्यालय रिट्ठाबोटका विद्यार्थी छाता ओढेर कक्षा लिन बाध्य भएका हुन् । विद्यालय कक्षाकोठा चुहिने भएपछि विद्यार्थीले छाता ओढेर कक्षा लिने गरेको नागरिक समाचारमा उल्लेख छ ।

तनहुँ हाइड्रोमा एडीबीको हस्तक्षेप
तनहुँ हाइड्रोको ठेक्काबारे अन्नपूर्णले आज मुख्य समाचार बनाएको छ । समाचार अनुसार निर्माण सुरु भइसकेको जलाशययुक्त यो आयोजनाको पुनः ठेक्का प्रक्रियामा एसिलायी विकास बैंकले हस्तक्षेप गरी रद्द गरेको छ ।

अघिल्लो वर्ष निर्माण सुरु भएको आयोजनाको पहिलो प्याकेजको ठेक्का रद्द भएपछि लागत र निर्माण सम्पन्न हुने तालिका प्रभावित भएको समाचारमा उल्लेख छ ।नेकपामा संविधान संशोधन बहस सुरु भएको, खाडी द्वन्द्वबारे नेपालले धारणा सार्वजनिक गरेको लगायत विषय पनि अन्नपूर्णको पहिलो पृष्ठमा पढ्न सकिन्छ ।

कस्तूरी पाल्नुस्, बिना बेच्नुस्
बिना बेच्नका लागि अब कस्तूरी पाल्न पाइने भएको छ । बिनाका लागि जंगलमा संरक्षित जनावर कस्तूरीको सिकार भइरहेका बेला अब जंगली जनावर कस्तूरीलाई नै पालेर त्यसबाट फाइदा लिन सकिने भएको छ ।कारोबारका अनुसार कस्तूरी पाल्नका लागि गौरीशंकर संरक्षण क्षेत्र आयोजनाले आह्वान गरेको छ । आफ्नो संरक्षण क्षेत्रभित्र कस्तूरी पाल्न चाहनेलाई उसले कस्तूरी नै उपलब्ध गराउने भएको छ ।कस्तूरीको मूल्य लाखौं रुपैयाँ पर्ने भएकाले यसको चोरी तथा सिकारी हुने गरेको छ । एउटा कस्तूरीले वर्षमा २० तोलासम्म बिना उत्पादन गर्छ ।

फेसबुकबाट तपाईको प्रतिक्रिया