प्रधानमन्त्री केपी शर्मा ओलीले गरेको प्रतिनिधि सभा विघटनविरुद्ध शनिबारपनि देशका विभिन्न स्थानमा विरोधका कार्यक्रमहरु भएका छन् । ती कार्यक्रमहरुमा संसद विघटनको विरोधमा रहेका दलका नेताहरुले संसद पुनस्र्थापना नभएसम्म आन्दोलन जारी राख्ने बताएका छन् ।
संयुक्त आन्दोलन गरौँ : बाबुराम भट्टराई
पूर्वप्रधानमन्त्री एंव जनता समाजवादी पार्टी (जसपा)का संघीय परिषद् अध्यक्ष डा.बाबुराम भट्टराईले संसद विघटनको विरोधमा संयुक्त आन्दोलन गर्न आव्हान गरेका छन् । प्रतिनिधिसभा विघटनको विरोधमा शनिबार धनकुटामा आयोजित विरोधसभामा भट्टराईले सबै दल र नागरिक समाजलाई आन्दोलनमा आउन आहृवान गरे । ओलीको प्रतिगामी कदमविरुद्ध सडक संघर्ष नै उपयुक्त विकल्प भएको उनको भनाइ छ ।
अदालतले संसद पुनस्र्थापना गर्छ : उपेन्द्र यादव
धनकुटामै आयोजित विरोध सभामा जसपाका अध्यक्ष उपेन्द्र यादवले अदालतबाट असंवैधानिक कदमको खारेज भइ संसद पुनस्र्थापना हुनेमा आफू विश्वस्त रहेको बताएका छन् । अदालतले यो कदम नच्याए जनताले आफै सच्याउने नेता यादवको दाबी छ । उनले पार्टीभित्रको विवादको बाहानामा प्रतिनिधि सभा नै भंग गरेर प्रधानमन्त्री केपी शर्मा ओलीले जंगबहादुर बन्ने सपना देखेको टिप्पणी गरे ।
देशलाई अस्थिरतातर्फ लैजान हुँदैन : रामचन्द्र पौडेल
नेपाली कांग्रेसका वरिष्ठ नेता रामचन्द्र पौडेलले देशलाई अस्थिरतातर्फ लैजान नहुने बतएका छन् । तनहुँको दमौलीमा आयोजित साक्षात्कारमा वरिष्ठ नेता पौडेलले सरकारबाट जनभावना अनुसार काम नभएको भन्दै यसको विरुद्ध एकजुट भएर लाग्नुपर्ने बताए ।
प्रतिनिधि सभा पुनस्र्थापना नभए सर्वनाश हुन्छ : घनश्याम भूसाल
नेपाल कम्युनिष्ट पार्टी नेकपा प्रचण्ड–नेपाल समूहका नेता घनश्याम भूसालले अबको विकल्प भनेको कि प्रतिनिधि सभा पुनस्थापना कि सर्वनाश मात्र भएको बताएका छन् । शनिबार झापाको विर्तामोडमा पार्टी कार्यकर्ता प्रशिक्षण कार्यक्रमलाई सम्बोधन गर्दै उनले यस्तो बताएका हुन् । अबको २० दिनपछि प्रतिनिधि सभा पुनस्थापना नभए देशमा बर्बादीको परिस्थिति श्रृजना हुने उनको चेतावनी छ ।
अहिलेको संघर्ष ‘क्वास वार’ हो : राम कार्की ‘पार्थ’
कार्यक्रममा प्रचण्ड–नेपाल समूहका अर्का नेता सुरेन्द्रकुमार कार्कीले अहिलेको संघर्षलाई ‘क्लास वार’को संज्ञा दिएका छन्। पार्टीको नेतृत्वले अझैसम्म पनि लक्षित वर्ग नचिनेको भन्दै नेता कार्कीले प्रधानमन्त्री केपी शर्मा ओलीले पूँजीवादलाई नै प्राथमिकता दिएका कारण अब वर्ग हेरेर पार्टीले काम गर्नुपर्ने बताए ।
